Logoding

Over SMEOT

SMEOT Stroatproat

“Doo miej den slieptol ‘s efkes”. “Gef mien spantang ’s an”. De Twentse taal heur iej alle dagen in dizze regio nog oaweral um oe hen. Op stroat, an ‘t voetbalveald, biej verjöardagen met de familie en op zoaterdagmoorn, a’j woarme broodjes haalt biej ’n bakker. En wis ok in de wearkplaatsen van oonze bedrieven en op de bouwplaatsen in Twente. Dan is ’t ginne vroag  mear of ’t Twents nog wa van dizze tied is. De Twentse sproak -of a’j wilt ’t dialect-  heurt der gewoon biej in dit deel van ’t laand. Vaak proat ’t ok makkelijker en he’j meender weur neudig um mekaar te begriepen. Mer der is mear. ’t Veult vertrouwd en döt gemeudelijk  an. En dat koomp biej ’t SMEOT good van pas. Dizze organisatie is al mear dan detigjoar gangs um van oonze jungs en wichter vakleu te maken veur de Twentse metaal- en elektrobedrieven. Ze wilt nich alleen leu ofleawer, dee met ’n kop mot noadeanken um de haan te loaten wearken. Nee, ze wilt van de leerlingen betrouwbare medewerkers maken, dee wet dat der regels bint um noa te kommen, da’j gewoon op tied komt, da’j netkes umgoat met ‘t gereedschap van ’n anner, da’j nen moat op ’t weark met respect behaandeld. En doarnöast wil hebt an wat ze doot. Doar begeent ’t SMEOT direkt met, a’j der veur ’t earste moal achterhen kiekt. Dat heurt biej ‘t profiel en de cultuur van ‘t instituut zegd ze rechtevoort. ‘t SMEOT steet veur discipline, ne strakke organisatie en no-nonsense. Mooie, eagentiedse managementtaal. In ‘t Twents zo’j zeggen; “wetten woar a’j an too bint en wa’j an mekaar hebt”. ’t Gebroek van de Twentse sproak in de wearkplaats hoof dat nich in ’n weg te zitten. Stearker nog; ’t dialect kan doar biej helpen. Völ leerlingen van ’t SMEOT komt van ’t plattelaand. De taal, dee de jungs en wichter sprekt as ze mekaar treft biej de tentfeesten, ’t bouwen van de carnavalswagens of de trekker- trekwedstrieden is vaak Twents. A’j de taal van hoes ok maijt en könt gebroeken op ’t weark veult dat vertrouwd. En dat past in de bedriefscultuur van dizze tied. In de neagenteende eeuw kwammen de earste bedrieven van de groond, dee later oetgreuien tot grote fabrieken as Stork, Heemaf, Hazemeijer, Dikkers en Signaal. De modersproak was in al dee joaren de voertaal, in völ gevallen tot an de directieleu an too. De Twentse metaal en elektrosector en Hengel ok is der groot met wörden. ‘t Hef zorgd veur ’n geveul van biej mekaar heuren, betrökkenheid biej ’t weark en loyaal wean an ’t bedrief. Dat is in de 21e eeuw nich aans en zöt ’t SMEOT good. Michiel Bron, praktijkdocent Mechatronica biej ’t opleidingsinsituut kon ’t in ’t book veur ’t viefentwintigjoarige jubileum in 2008 mooi zeggen: “Maar we zijn nuchter. Het moet geen blablaverhaal worden”. Dat is noe ne typische Twentse mentaliteit, dee past biej ’t SMEOT.

 

Harry Nijhuis
Streektaalconsulent TwentseWelle 

Brancheorganisaties

Metaalunie lid

 

logo_fme

 


Logo_-_FNV_Bondgenoten

Vakorganisaties

cnvlogobmptrans

 

Logo-De-Unie-351(2)